Die Mundart der Grafschaft Glatz (Schlesien)

Inhaltsübersicht 2001

Monat, Jahr

Gedicht des Monats

Dezember 2001

Eurojubel

November 2001

's letzte Derhääme
Doas oalls macht Häämte aus

Oktober 2001

Unbekehrbar

September 2001

Kiehehitta

August 2001

A Fernsehtraam

Juli 2001

Woassergemmnastik

Juni 2001

Johannesfoier

Mai 2001

Die Muttel

April 2001

Grinndoonerschtiech
Der Uusterhoase

März 2001

Spätschäden
Friedensgespräche

Februar 2001

Lichtmeß

Januar 2001

Spretza

Gedicht des Monats Dezember 2001

Eurojubel

Der Euro werd etz huuchgejubelt,
Aach wenn es ons eim Bauche kruubelt,
Denn tu mer rechtiech ons besenna,
Doo waarn känn Zeetscher mähr gewenna.

Der Euro kemmt,
Die Mark ons nemmt,
Doas stißt ons uuf,
Mier zoahla druuf.

Der Toaler ging,
Die Goldmark ging,
Die Reichsmark ging,
Die D-Mark macht etz klinglingling!

Se kullert fatt, ma macht änn Striech,
- Der Staat sackt wieder ei fer siech. -
Aach wenn ma nooch asusähr flennt,
Der Biehma gieht, es kemmt der Cent.

Woas ma gespaort, sool siech hoalbieran,
Der Wert glä bleit! 's sool nischt poassiearn!
Vu Lacha hillt ma siech die Wompe
On denkt eim Stella bloßiech: "plompe!"

Erhard Gertler

Gedichte des Monats November 2001

's letzte Derhääme

Se macha fatt,
siech doo on datt,
die Loite vu Derhääme

Se hoan gehofft,
goar viel on oft',
die Loite vu Derhääme.

Se hoan gewatt,
hoan viel gebatt,
die Loite vu Derhääme.

Der Ääne gieht,
der Andre gieht, -
's sein Loite vu Derhääme.

On jeder nemmt,
dar droane kemmt,
woas miete vu Derhääme.

Erhard Gertler

Doas oalls macht Häämte aus

Ihr Loite, nä, ons fahlts oa nischt,
Der Wohlstand hoat ons rään derwescht
Mier hoan zo Trenka, hoan zo Assa
On kenna oalls woas woar vergassa.

Mier joamarn zwoar: "Woas sool ock warn?"
On kenna ons die Welt besahn.
Well mer ärn Sonne, fliech mer fatt.
Well mer ärn Schnie, werd nee gewatt.

Oalls woas mer wella kenn mer kriecha,
Wenn ma gutt zoahlt, doo watt's a tiecha.
Die Welt werd klänner, Joahr fer Joahr,
Die Wensche grisser, ies doch kloar.

Blooß wenn mersch nohnde ons besahn,
Hoats nischt, woas ons die Welt koan gahn.
A klä weng Ruhe, - siech besenna,
Koan ma Derhääme blooß gewenna.

Wenn die Natur ma siech besitt
On watt, - on watt, - woas se doo britt.-
On poaßt, - on poaßt, - off jeda Taag,
Werd's schien? Watts rännn? Gibt's Hoajelschlaag?

Kemmt ärn Gefreste wieder amoal,
Woas oalls zom Teifel macha sool?
Kriech mer aach oalls nooch eigefoarn,
Genau wie ei a forch'ta Joahrn?

Kemmt ärn der Wenter nee zo schnelle?
Wird's a nooch Lichtmass ehnder helle?
Kemmt a doas Friehjoahr ganz gewieß,
Asu wie's jedem rechtiech ies?

-Gieht aach der Wend nooch em doas Haus?-
Doas oalls macht schließlich Häämte aus.
Wenn doas nee ies, - amende fahlt,
Werd's Hatze Stomm, - die Seele kaalt.

Erhard Gertler

Gedicht des Monats Oktober 2001

Unbekehrbar

Seit dem ich weiß, wie Fürsten lebten,
Wie gierig nach der Macht sie strebten.

Seit dem ich weiß, wie Demokraten,
Geschwinde in den Sumpf geraten.

Seit dem ich weiß, wie vieles faul,
Wünscht ich, ich wär' und blieb ein Saul.

Erhard Gertler

Gedicht des Monats September 2001

Kiehehitta

Mier treiba naus! Mier treiba naus!
Die Kiehe off die Wääda.
Eim Stoalle hillts kä Viech nee aus,
Nää satt ock blooß die Frääda!

Se troaba rään zom Gronde datt,
Met huuch gehobnem Schwanze.
Die Frääde haat, nä, satt ock , satt!
Ies wie beim Kärmeßtanze.

Die Pfuuta schlenkarn hie on har,
Zengst naus die ganze Strecke.
Die Koalbe on doas Exla a,
Oalle sein rään gemecke.

Doas letze Grien, nä ies doas schien,
War koan die Fraßlost massa?
Met a Klaua tief eim Klie-e stiehn,
Dernoo Kliebliemlan frassa.

Oals Härttajengla henderhar,
Doas Peitschla lett ma knoalla,
-'s Kartoffelfoier lodert a,-
Waam teet doas nee gefoalla?

Och welche Lost! Och welche Lost!
Mier sein doch Pauerkender.
Aach wenn's äm oosiech Oarbt a kost,
Mier laaba halt gesender.

Erhard Gertler

Anmerkungen: 1: Mechehel = Michael: Tag des hl. Michael, 29. September

Anmerkungen: 1: N. N. = es wurde hier der Name des Brotherrn eingeschaltet. 2 : Statt Jonge hörte man auch "Foilich", d. i. Faulpelz.

Anmerkungen: 1: Brie, Feierla, brie = brenne, Feuerchen, brenne. 2: Die genügsamen Ziegen verhalten sich auf der Weide ruhiger als die Kühe, so daß der Hirt gemächlich bei seinem Feuerchen, das er aus dürrem Kartoffelkraut, Unkraut, Strohresten angezündet hat, liegen kann.
Das Liedchen sangen Kuhhirten beim Hütefeuerchen. In Lichtenwalde sang man statt "ala Ziecha" "faula Zecha". In gleichem Text und gleicher Melodie viel verbreitet.

Gedicht des Monats August 2001

A Fernsehtraam

Iech toate laasa. -
Vu Frääde wullt iech raasa.
Stenzel; Wenzel, Prause, Pietsch!
Nooch etza tief eim Hatze ziehts.

Noama! Noama! Noama! -
Oalle mier bekannt vierkoama.
Die ma kamm nooch laasa tutt,
Sein die heute nemme gutt? -

Och, wie hoa iech druuf gewatt!
Lange, lange, woarn se fatt
On se woarn nooch zo derkenna!
"Schlesch," wiel iech se einfach nenna.

Blooß iech hoarte nee die Stemma,
Die Teene toata mier verschwemma.
Fremde Teene woarn derbei
On schon woar der Traam verbei.

Erhard Gertler

Gedicht des Monats Juli 2001

Woassergemmnastik

Eim Aalder häßts, es wär ganz gutt,
Wenn ma siech bewääjen tutt.
Ma sool siech ohne gruußes Wemmarn,
Glä em seine Knocha kemmarn.
On, - weil die schonnt eigerost,
Macht ma's halt, - ägal woaß's kost.

Ma fährt ei's Boad on lett siech knaata,
Tutt hoppa; sprenga, Woassertraata,
Fuchtelt met a Oarma rem,
Brängt sänn Nockwer hoalb nooch em,
Schwemmt off'm Recka, off der Brost,
Ma hoat bezoahlt on wääß woaß's kost.

Der Boademääster, - meine Giete!
Tremmliert änn oa on ma macht miete.
Schluckt Woasser, litterweise glei,
Kriechts aach ei die Aaja nei,
Verrenkt siech emmer, emmer wieder,
Doas Genecke on die andarn Glieder.

Stroabelt, nä,'s ies werkliech schlemm,
Wie a Elefant eim Woasser rem.
Doas Geschende, nä verpocht,
Werd goar nooch on nooch zor Socht.
Ma hofft, ma watt es goar nooch packa,
Doas die Knocha leiser knacka.

Ma hofft, es wird ämm nooch gelenga,
Wieder wie a Herschla sprenga!
Oaber, 's bleit asu wie's ies,
Aalt bleit aalt, doas ies gewieß.
Die Hoffnong, die werd kamm gestellt,
- Ma hoot siech halt woas eigebeldt. -

Erhard Gertler

Gedicht des Monats Juni 2001

Johannesfoier

Es brieht! Es brieht! Es brieht!
Kommt ock baale oalle miet!
Datte, datt, da helle Schein,
Muuß doas Johannesfoier sein.

Nä, asu a gruußes Foier,
Duuba off daam Barje hoier !
Nahmt die aala Baasem miet,
Kommt ocke! Es brieht! Es brieht!

Muusiech sools glä datte haon,
Tanza koan etz Weib on Moan;
Derbeine schiene Lieder senga
On aach iebersch Foier sprenga.

Lott Euch doas blooß nee entgiehn,
Hente werds goar roasniech schien.
Hente werd getanzt gelacht,
Denn es ies Johannesnacht.

Kommt ock oalle, wie der seid!
Etza ies doch Sommerzeit.
Kommt ei Lottscha, kommt ei Pootscha,
Oaber kommt mer ruff gelootscha!

Lang ies der Taag on korz die Nacht,-
Wenn vum Traame Ihr derwacht,
Weßt der wie ma's macha sool, -
Blooß Ihr merkt, es woar amoal.

Erhard Gertler

Johannistag (24. Juni)

Am Johannistag leuchteten von allen Bergen die Johannisfeuer, die auf den vorchristlichen Brauch der Sommersonnenwende zurückgehen. Die Kirche legte in diese Zeit das Fest Johannes des Täufers. Neunerlei Kräuter wurden am Johannistag gepflückt als Heilmittel gegen Fieber und andere Krankheiten. Johanniskraut verwehrte Unholden den Eintritt in Haus und Stall, wenn es über den Türen angenagelt wurde. Margeriten, die an diesem Tag gepflückt wurden, streute man unter den Tisch in der Stube, um dem heiligen Johannes ein Nachtlager zu bereiten.

aus: "Lexikon der Grafschaft Glatz"
von Aloys Bernatzky, S. 124

Gedicht des Monats Mai 2001

Die Muttel

Der echta gleetscha Muttel,
Da sei mier oalle gutt.
Ihr Hazze on Gemitte,
Doarchlääft besondres Blutt.

Se träät ei ihrem Wesen,
Die ganze Häämte miet.
Fer Häämte on Familie,
Ihr stelles Hazze briet.

Ock emmer hibsch bescheiden,
Wenn's sein muuß resolut,
On met äm festa Wella,
Doarchkämpft se jede Nuut.

A Herrgoot well mer bieta,
Doas a derhaala tutt,
Die Grofschoaft Glootzer Muttel,
Ihr sei mer oalle gutt.

Erhard Gertler

Gedichte des Monats April 2001

Grinndoonerschtiech

Tutt ock kloapparn, tutt ock senga,
Lott vu Haus zo Häusla sprenga,
Daan Gedanka määne iech,
Nooch off a Grinndoonerschtiech!

Woas ons bleit sein die Gedanka,
On die selt mer ohne Wanka
Emmer wieder wetter gaan,
Es luhnt siech a, Ihr watt schonn sahn!

Lott daan aala Brauch nee sterba,
Tutt a wengste nooch vererba,
Doas a nee der seichta Welt,
A volls nooch zom Opfer fällt.

Denn goar moanches ies verschwonda,
Woas eim Brauchtum mer gefonda,
Woas a nemme wiederkemmt,
Weil's die Zeit äms miete nemmt.

Drem tutt kloapparn on tutt senga!
Joa, es muuß ons doch gelenga,
A Steckla Häämte zo derhaala,
Lott's oam Grinndoonerschtiech nee fahla!

Erhard Gertler

Der Uusterhoase

Satt a'n datte off daam Roasa,
Hoppa on eim Zickzack sprenga?
Onsa klääna Uusterhoasa?
Ob a ons woll wiel woas bränga?

Satt ock, wie a Mannlan macht!
Die Pfutlan hebt, die Leffel spetzt!
Wie a oalles schien beacht't
On derbei oam Schwänzla setzt.

Satt ock, wie sei Nasla schnuppert!
Wie a etze rieber guckt.
Jekersch, wie sei Hazzla puppert!
Och, etz hoat a siech geduckt.

Etza schisst a Porzelbäcke,
Satt Euch das blooß äänziech oa!
Nä, da Kalle ies gemecke,
Doo kemmt nee baale ääner droa.

Uusterhoase! Flinkes Perschla!
Komm ock rieber, Komm ock rei!
Mier macha Dir a schienes Nestla
On doo leest De ons woas nei.

Koannst dann sprenga off daam Groase,
A ganzes Joahr lang nooch, na gell?
Uusterhoase! Uusterhoase!
Komm ock baale, komm ock schnell!

Erhard Gertler

Gedichte des Monats März 2001

Spätschäden

Kind sucht die Freiheit,
Mama sucht Heimat,
Papa die Vernunft,
Wo liegt die Zukunft?

Nichts lässt sich fassen,
Nichts will mehr passen,
Nichts will mehr rühren,
Nichts lässt sich spüren.

Alles gewesen,
Kaum ein Genesen,
Nah ist das Sterben,
Wo sind die Erben? -

Erhard Gertler, 12/2000

Friedensgespräche

Streit bricht aus. -
Baut Mauern auf!
Baut Wälle an den Rändern!

Ruft auf! Ruft auf!
Zum Frieden auf!
Laßt doch die Hunde bellen.

Bleibt blind! Bleibt blind,
So wie ein Kind!
Hofft Mensch und Welt zu ändern.

Nur wer da fühlt,
Wird abgekühlt,
Kann sich der Zukunft stellen.

Erhard Gertler, 12/2000

Gedicht des Monats Februar 2001

Lichtmeß

Lichtmeß heißt es:
"Das Spinnen vergeß!"
Winter wird enden,
Alles sich wenden.

Dunkelheit schwindet,
Freude sich findet.
Hände sich regen,
Neues bewegen.

Alles wird heller,
Tag vergeht schneller,
Muße vorbei,
Frohsinn "Juchei!"

Neues Erleben,
Künftiges Streben,
Freudiges Hoffen,
Alles ist offen.

Erhard Gertler, 12/2000

Gedicht des Monats Januar 2001

Spretza

Na verflemmt, foast jeda Taag,
Daan der Herrgoot wiel on mag,
Lääft a met der Spretze remm,
Asu oals wär doas goar nee schlemm.

Onser Nockwer spretzt on spretzt,
Ei der Hoffnong doaß woas netzt,
Gejen Mehltaa, gejen Läuse,
Gejen Loarva eim Gehäuse.

Gänsebliemlan, Unkrautpflanza,
Oalls bespritzt a doo eim ganza,
Oalles woas a nee on braucht,
Werd ei Gefte eigetaucht.

Waxa sool ei Reinkultur,
Äbens onsere Natur. -
Doo dreckt änn baale doas Gewessa,
Koan ma siech ärn daam verschlessa?

Drem gieht ma ei änn Loaden nei,
Kääft siech ääne Spretze glei.
Dernoo bespretzt ma gutt on viel,
Oalles woas ma goar nee wiel.

Hofft, doaß siech, wie ma's on kennt,
Die Spree-e a vum Wääße trennt.
Derbeine nä, 's ies wie verpflecht,
Hoat a Wääß ma miet vernecht.

Derwäjen bleit se kenftiech etze,
Weil se ämm nee groade netze,
Die Spretze datte wu se ies,
Eim Schoppa on oalls wäxt wie's ies.

Erhard Gertler, 06/2000